FHN Xəbərlər | İctimai-siyasi onlayn qəzet

Son zamanlar Alyaskadakı Spurr vulkanında baş verən kiçik zəlzələlərin sayı artıb. Bu da vulkanın püskürmək üzrə ola biləcəyi ilə bağlı narahatlıqları artırır.

Spurr dağı dəniz səviyyəsindən 3370 metr yüksəklikdə yerləşir və son 10 ayda artan vulkanik aktivliyə görə mütəxəssislər onun püskürmə ehtimalının 50 faiz olduğunu bildirirlər.

Alyaska Vulkan Rəsədxanasından vulkanoloq Metyu Haney” ABC News”a bildirib ki, bölgədə zəlzələlərin sayı əhəmiyyətli dərəcədə artıb və püskürmə ehtimalı hər gün daha reallaşır.

Vulkan Ankoric şəhərindən cəmi 130 kilometr qərbdə yerləşir və bu, şəhəri böyük təhlükə altında qoyur. Partlayış baş verərsə, şəhər 1953-cü ildəki partlayışda olduğu kimi kül buluduna bürünə bilər. O zaman dəniz səviyyəsindən 10 min metrə qədər yüksələn kül buludunun görüntüləri və şəhərdə nəqliyyat vasitələrinin külünü təmizləmə cəhdləri tarixə keçib. Xoşbəxtlikdən partlayış nəticəsində ölən olmayıb.

Amerika Birləşmiş Ştatları Geoloji Tədqiqat İdarəsi də vəziyyətin kritik olduğunu təsdiqləyib.

Spurr dağının sonuncu püskürməsi 1992-ci ildə üç ayrı partlayışla baş verib. Ankoric hava limanı kül və torpaq buludlarına görə 20 saat bağlanmalı olub. O zaman şəhərə milyonlarla dollar ziyan dəyib. Bu gün aktivlikdə oxşar artım baş verir, lakin indiyə qədər heç bir partlayış baş verməyib.

Haneyin sözlərinə görə, bu kiçik zəlzələlərə əlavə olaraq, vulkanın səthi təxminən 6,4 sm şişib. Bu, altında nəyinsə yığılmağa davam etdiyinin başqa bir əlaməti hesab olunur.
Lakin ekspertlər bildirirlər ki, bu əlamətlər əvvəlki illərdə də müşahidə olunduğundan və partlayışsız bitdiyindən hazırda təcili tədbirlər görülməsinə ehtiyac yoxdur.

2004 və 2012-ci illərdə Spurr dağında oxşar titrəyişlər qeydə alınıb, lakin bu hadisələr püskürmə ilə nəticələnməyib. Püskürmə baş verərsə, seysmik aktivlik daha çox olacaq və bu, əvvəlcədən xəbərdarlıq etməyə imkan verəcək.

Hazırda mütəxəssislər vulkanın dərinliklərində baş verənləri daha yaxşı başa düşmək üçün Spurr dağını diqqətlə izləyirlər. Keçmişdə baş verən böyük püskürmələr vulkanın təhlükə yarada biləcəyini göstərir, ona görə də mütəxəssislər hadisələri yaxından izləyirlər.