Ümumi məlumat

“Fövqəladə Hallar Nazirliyinin qəzeti” 15 iyun 2006-cı ildə ilk nüsxəsi ilə işıq üzü görüb. Azərbaycan Respublikası Ədliyyə Nazirliyi tərəfindən rəsmi dövlət qeydiyyatına alınıb. İctimai-siyasi qəzet olaraq həftədə bir dəfə Azərbaycan və ingilis dillərində nəşr olunub. Qəzetdə ümummilli lider Heydər Əliyevin ölkəmizin və xalqımızın tarixi taleyində misilsiz xidmətlərindən bəhs edən yazılara, Azərbaycan Prezidenti, Müzəffər Ali Baş Komandan İlham Əliyevin çoxşaxəli fəaliyyətinə geniş yer verilib. Qəzetin hər buraxılışında günümüzün aktual problemlərinin analitik təhlilinə həsr olunan məsələlər işıqlandırılıb. Fövqəladə Hallar Nazirliyinin gündəlik qayğıları, əhalinin və ərazilərin təhlükəsizliyi sahəsində mühüm əhəmiyyət kəsb edən məlumatlandırıcı materiallar əksini tapıb. Mətbu nəşrdə Azərbaycan Respublikasında mülki müdafiə sisteminin prinsipləri, əhalinin fövqəladə hallara hazırlanması, fövqəladə hallarda davranış qaydaları üzrə maarifləndirilməsi, fövqəladə hallarla mübarizə sahəsində beynəlxalq təcrübə və s. səpkili materiallar dolğun faktlarla oxuculara çatdırılıb. Toxunulan mövzuların geniş ictimai marağı və əhalinin maarifləndirilməsi işində əhəmiyyətli rolu nəzərə alınaraq, o cümlədən daha geniş informasiya sahəsini əhatə edə bilmək üçün qəzetin fəaliyyəti 2023-cü ilin yanvar ayından www.fhnews.az (fovqəladəxəbərlər) internet portalı kimi davam etdirilir. “Fövqəladə Hallar Nazirliyinin qəzeti”-nin bazası əsasında fəaliyyət göstərən www.fhnews.az (fovqəladəxəbərlər) ictimai-siyasi onlayn qəzetdir.