FHN Xəbərlər | İctimai-siyasi onlayn qəzet

Uşaq və yeniyetmələrin kitab oxumamasından narahat olan təhsil üzrə britaniyalı ekspertlər audio formata üstünlük verilməsini təklif edirlər. Hökumət bu təklifi nəzərə ala bilər.

Fhnews.az xarici mediaya istinadla xəbər verir ki, son illər bir çox dünya ölkələrində olduğu kimi, Böyük Britaniyada da narahatedici tendensiya müşahidə olunur. Belə ki, uşaq və yeniyetmələr günü-gündən daha az bədii kitab oxuyurlar.

Milli Savad Fondunun (NLT) 37 min Britaniya məktəblisi arasında keçirdiyi sorğu göstərib ki, uşaqların yalnız 34.6 faizi asudə vaxtlarında kitab oxuyur.

Bununla yanaşı audiokontentlərə olan maraq artır. Həmin “NLT” sorğusuna görə, uşaq və yeniyetmələrin 42,3 faizi audiokitab və podkast dinləməyi sevir.

Bu səbəbdən ekspertlər və xeyriyyə təşkilatları audiokitabların yeni məktəb proqramına daxil edilməsini tövsiyə edirlər. Onların fikrincə, belə bir addım gənclərin mütaliəyə marağını yenidən oyatmağa və onların savadının artmasına kömək edə bilər.

“NLT”nin icraçı direktoru Conatan Duqlas qeyd edib ki, audiokontent yeni nəsil oxucuların tərbiyəsində və mütaliə böhranının aradan qaldırılmasında mühüm rol oynaya bilər.

Lakin bu yanaşma ilə bütün mütəxəssislər razı deyil. London Universitet Kollecinin ingilis dili üzrə professoru Con Mullan hesab edir ki, audiokitablar ənənəvi çap nəşrlərini tam əvəz edə bilməz. O vurğulayır ki, oxumaq və dinləmək fərqli proseslərdir, belə ki, ikincidən fərqli olaraq, birincisi aktiv iştirak və təsəvvür gücü tələb edir. Mullan qeyd edir ki, audiokontent faydalı ola bilər, lakin çap nəşrlərini tam əvəz edə bilməz.

Böyük Britaniya hökuməti yaxın vaxtlarda məktəb proqramında ediləcək dəyişikliklər barədə ara hesabat yayımlamağı planlaşdırır. Gözlənilir ki, bu hesabatda audiokontentin tədris prosesinə daxil edilməsi məsələsinə də toxunulacaq. Böyük Britaniya Təhsil Nazirliyinin nümayəndəsi “The Guardian”a müsahibəsində bildirib ki, artıq uzun müddətdir müəllimlərə şagirdləri müxtəlif yollarla ədəbiyyatla tanış etmək çağırışı edilir. Bu baxımdan, audiokitabların dinlənilməsi ədəbiyyatla təmasda olmağın əlavə bir üsulu ola bilər.