FHN Xəbərlər | İctimai-siyasi onlayn qəzet

İkinci Dünya Müharibəsində Almaniyanın işğalı altında olan Yunanıstan Avropalı tərəfdaşından müharibə zamanı dəyən zərərin əvəzini ödəməsini istəyir. Təxminən 400 min Yunan vətəndaşının həyatını itirdiyi İkinci Dünya Müharibəsindən sonra Yunanıstan-Almaniya əlaqələri Avropa Birliyi (AB) daxilində formalaşarkən, ödənişsiz müharibə təzminatı kimi problemlər münasibətlərdə varlığını davam etdirdi.

Almaniya prezidenti Frank-Valter Ştaynmayerin bu həftənin əvvəlində Yunanıstana səfərinin Saloniki tərəfində Ştaynmayerin hələ tikilməkdə olan Holokost Muzeyinə səfəri, Afina tərəfində isə Yunanıstan Prezidenti Katerina Sakelaropulu Ştaynmayerə ödənilməmiş müharibə təzminatını xatırlatdı.

Saloniki Universitetinin tarix professoru Stratos Dordanas İkinci Dünya Müharibəsindən sonra Almaniya ilə Yunanıstan arasındakı əlaqələri və Yunanıstanın Almaniyadan müharibə təzminatı gözləməsini qiymətləndirib. 1940-cı il oktyabrın 28-də Yunanıstanın baş naziri Yannis Metaksas İtaliya qüvvələrinin “Alban sərhədini bizim üzümüzə açın” tələbinə “Xeyr” cavabını verdi və bu, İkinci Dünya Müharibəsində Yunanıstanın işğalçı qüvvələrin hücumuna məruz qalmasına səbəb oldu.

28 oktyabr 1940-cı il tarixinin müasir Yunan tarixi üçün əhəmiyyətli bir gün olduğunu bildirən Dordanas bu gündən sonra Yunanıstanın İtaliya, Almaniya və Bolqarıstandan hücumlarla üzləşdiyini qeyd edib.

Bu hücumların Yunanıstan kimi kiçik bir ölkə üçün kifayət qədər sarsıdıcı olduğunu bildirən Dordanas Yunanıstanın məhdud imkanlarla mübarizə apardığını bildirib. Almaniyanın Yunanıstanı işğalına 6 aprel 1941-ci ildə başladığını xatırladan Dordanas "Ölkənin alman qüvvələri tərəfindən işğalı müasir Yunanıstan tarixində yeni bir dövr açdı"-deyib.

İkinci Dünya Müharibəsində Yunanıstanın Almaniya, İtaliya və Bolqarıstan tərəfindən işğalının da ölkədə vətəndaş müharibəsinə gedən yolda təsirli olduğunu bildirən Dordanas işğal dövrünün aclıq və yoxsulluq kimi ciddi problemlərə səbəb olduğuna diqqət çəkib.

Dordanas müharibənin ilk ilində başda böyük şəhərlər və bəzi adalar olmaqla ölkə daxilində aclıqdan 150 mindən çox insanın həyatını itirdiyini, alman qüvvələrinin bir çox kənd və qəsəbədə böyük dağıntılara və kütləvi mülki itkilərə səbəb olduğunu bildirib.

İşğal zamanı qıtlıq səbəbindən bazarda ilkin tələbat mallarının qara bazarının hakim olduğunu bildirən Dordanas işğalçı qüvvələrlə əməkdaşlıq edənlərə görə cəmiyyətdə qopmaların da olduğunu bildirib.

Dordanas Selanik başda olmaqla ölkədə yaşayan yəhudi icmasının da müharibədən təsirləndiyini və təxminən 60 min yəhudinin həyatını itirdiyini bildirib.

Müharibənin Yunanıstanda insan itkisi ilə yanaşı böyük maddi ziyana da səbəb olduğuna diqqət çəkən Dordanas müharibənin Yunanıstanı həm iqtisadi, həm də sosial baxımdan viran bir ölkəyə çevirdiyini bildirib.

Dordonas qeyd edib ki, ölkələrin müharibədə verdikləri can itkiləri o dövrdəki əhalisi ilə müqayisədə qiymətləndirildikdə, müharibədən əvvəl təxminən 7 milyon əhalisi olan Yunanıstan dünyada ən çox can itkisi verən ikinci ölkə olub. Dordanas Yunanıstan və Almaniya arasında müharibədə müxalif olduqları üçün 20-ci əsrin ilk yarısında düşmənçiliyin hakim olduğu bir əlaqənin inkişaf etdiyini və İkinci Dünya Müharibəsinin bu əlaqələrdə əhəmiyyətli bir travma olduğunu ifadə edib. O, bildirib ki, Yunanıstan və Almaniya bu gün Qərb dünyasında eyni tərəfdə müttəfiq olsalar da, İkinci Dünya Müharibəsinin travması, müharibənin təzminatı ödənilmədiyi üçün bağlanan səhifə deyil.