FHN Xəbərlər | İctimai-siyasi onlayn qəzet

Ölkəmizin müstəqillik tarixində ilk dəfə olaraq ərazi bütövlüyü və suverenliyimizin tam bərpa edildiyi şəraitdə Azərbaycan Respublikasının Milli Məclisinə növbədənkənar seçkilərin keçirilməsi yeni tarixi dövrdə cəmiyyətin yeniləşdirilməsinə və daha genişmiqyaslı islahatların həyata keçirilməsinə xidmət edir. Cəmiyyətin aparıcı qüvvəsini təşkil edən Yeni Azərbaycan Partiyasının ilk dəfə olaraq bütün dairələrdən – 125 seçki dairəsindən öz namizədlərini irəli sürməsi zəngin ənənələri olan bu güclü və mütəşəkkil partiyanın böyük siyasi potensiala, etibarlı ehtiyat kadr bazasına malik olduğunu göstərir. Bu, həm də Yeni Azərbaycan Partiyasının növbəti dəfə qalib gəlmək əzmini, qələbə qazanmaq inamını aydın şəkildə nümayiş etdirir.

Fhnews.az xəbər verir ki, bu fikirləri Azərbaycan Milli Elmlər Akademiyasının prezidenti akademik İsa Həbibbəyli söyləyib.

Akademik bildirib ki, Yeni Azərbaycan Partiyasından olan namizədlərin sırasında tanınmış ziyalıların, zəngin təcrübəyə malik mütəxəssislərin, cəmiyyət tərəfindən qəbul edilən adlı-sanlı simaların olması da partiyanın yenidən parlamentdə səs çoxluğunu qazanacağına böyük inam yaradır. Partiyanın namizədləri sırasında çoxillik parlament təcrübəsinə malik deputatların yer alması partiyanın qızıl fondunu daha da möhkəmləndirmək, onların bilik və bacarıqlarından müasir cəmiyyətin inkişafı naminə yaradıcı şəkildə istifadə etmək prinsipinə sadiqliyinin ifadəsidir.

“Müşahidələr göstərir ki, partiyamızın namizədlər siyahısı, eyni zamanda, gənc qüvvələrlə zənginləşdirilib. Bu isə Yeni Azərbaycan Partiyasının yeni tarixi dövrdəki yeniləşmə proseslərinə həm də yeni qüvvələrlə getmək iradəsinin real göstəricisidir. Həmçinin seçkilərdə Yeni Azərbaycan Partiyasından olan qadın namizədlərin çoxalması ölkəmizdə gender bərabərliyi təşəbbüslərinin daha da inkişaf etdirilməsinə təkan vermək məqsədi daşıyır. Fikrimcə, Yeni Azərbaycan Partiyası ərazi təşkilatlarının bir çox sədrlərinin deputatlığa namizəd göstərilməsi də məqsədyönlü addım olub, parlamentdə iqtidar partiyasının mövqelərinin daha da gücləndirilməsinə xidmət edən əhəmiyyətli gedişdir.

Bir sözlə, atılmış ilkin məqsədyönlü addımların təhlili onu göstərir ki, Yeni Azərbaycan Partiyasının namizədləri seçkiqabağı siyasi mübarizədə yüksək səviyyədə və fəal şəkildə iştirak etmək üçün bütün imkanlara malikdirlər. Bütün bunlar isə Milli Məclisə seçkilərdə cəmiyyətin bütün təbəqələrindən olan seçicilərin fəallığının artmasına ciddi şəkildə təsir göstərəcək.

İnanırıq ki, Azərbaycan Respublikasının Milli Məclisinə VII çağırış üzrə seçkilər hər zaman olduğu kimi demokratik mübarizə şəraitində keçəcək, ölkəmizdə müasir inkişafın yeni mərhələsinə çatmaq üçün siyasi-ideoloji zəmin hazırlayacaq, ali qanunverici orqanımızın irəliyə doğru inkişafına daha yüksək səviyyədə xidmət edəcək. Bütövlükdə VII çağırış üzrə Milli Məclisə keçiriləcək seçkilər müstəqil dövlətimizin daha da inkişaf etdirilməsi yollarında dönmədən və qətiyyətlə mübarizə aparan Azərbaycan Respublikasının Prezidenti İlham Əliyevin həyata keçirdiyi çoxşaxəli və məqsədyönlü siyasətin gerçəkləşməsinə özünün layiqli töhfəsini verəcək.

Yeni Azərbaycan Partiyasına və onun namizədlərinə qarşıdan gələn növbədənkənar parlament seçkilərində uğurlar arzulayıram”, - deyə akademik İsa Həbibbəyli fikrini yekunlaşdırıb.