FHN Xəbərlər | İctimai-siyasi onlayn qəzet

2024-cü il oktyabrın 2-3-də Omanın Muskat şəhərində “Təhsildə Transformasiya Sammitinin qərarları: öhdəliklərdən fəaliyyətlərə” mövzusunda ICESCO-ya üzv ölkələrin təhsil nazirlərinin 3-cü konfransı keçiriləcək.

Fhnews.az təşkilatın saytına istinadla xəbər verir ki, tədbir İslam Dünyası Təhsil, Elm və Mədəniyyət Təşkilatı (ICESCO) tərəfindən Omanın Təhsil Nazirliyi, bu ölkənin Təhsil, Mədəniyyət və Elm üzrə Milli Komissiyası ilə koordinasiya əsasında keçiriləcək. Konfransda İslam ölkələrinin təhsil nazirləri, 27 regional və beynəlxalq təşkilatın yüksəksəviyyəli nümayəndə heyətləri, eləcə də təhsil məsələləri ilə məşğul olan vətəndaş cəmiyyəti institutları iştirak edəcəklər.

Konfransın məqsədi ICESCO-ya üzv ölkələrdə təhsilin transformasiyası üzrə öhdəlikləri gücləndirmək, qabaqcıl təcrübələrin yayılması və onların tətbiqini sürətləndirmək üçün effektiv mexanizmlər yaratmaqdır.

Bundan əlavə, ICESCO üzv dövlətlər arasında əməkdaşlığı inkişaf etdirməyə, maliyyələşdirmə və donor qurumlarını birləşdirən şəbəkə qurmağa, Təhsildə Transformasiya Sammitinin nəticələrinə nəzarət etmək üçün mexanizmləri inkişaf etdirməyə və nazirliklərin bu sahədə səylərini dəstəkləyən proqramlar yaratmağa çalışır. Konfrans, həmçinin İslam dünyasının sivilizasiya irsində təhsil transformasiyasını dəstəkləyən etik dəyərlərə əsaslanan prinsipləri vurğulayacaq.

Konfrans çərçivəsində təhsil sahəsində aparıcı qlobal təşkilat və şirkətlərin, o cümlədən “NewGlobe”, “Avantis”, “Classera”, “Alef Education” və Təhsil Test Xidmətinin (ETS) iştirakı ilə sərgi olacaq. Bu sərgilər Beynəlxalq Bakalavr Təşkilatı və Kembric Universiteti ilə akademik tərəfdaşlığı da əhatə edəcək.

Tədbirdə, həmçinin qlobal təhsilə dair perspektivlər, təhsilin transformasiyası üçün çoxtərəfli tərəfdaşlıqlar, təhsildə süni intellekt, yaşıl təhsil, böhranlar və fövqəladə hallar zamanı təhsilin davam etdirilməsi kimi əsas təhsil mövzularına toxunan akademik sessiyalar keçiriləcək. Konfransda bir sıra icra hesabatları da nəzərdən keçiriləcək və qəbul ediləcək.

Müzakirə ediləcək hesabatlara ICESCO-nun 2021-ci ilin yanvarından 2024-cü ilin iyuluna qədər təhsil fəaliyyəti, qızların təhsilinin hazırkı vəziyyəti, media savadlılığı, Londonda keçirilən nazirlər görüşünün nəticələri, erkən uşaqlıq dövründə təhsil və qayğının inkişafı, ICESCO-nun Nizamnaməsi, habelə AI etikası sənədi daxildir.

Tədbir “İslam dünyasında təhsilin transformasiyasına dair Muskat Bəyannaməsinin qəbulu və növbəti konfransın tarixinin və yerinin elan edilməsi ilə yekunlaşacaq.