FHN Xəbərlər | İctimai-siyasi onlayn qəzet

Fövqəladə Hallar Nazirliyinin Aparatının bir qrup əməkdaşı və Tikintidə Təhlükəsizliyə Nəzarət Dövlət Agentliyinin (TTNDA) mütəxəssislərindən ibarət nümayəndə heyəti Türkiyənin İstanbul şəhərində səfərdə olub.

Səfər 22 dekabr 2022-ci il tarixində Ankara şəhərində imzalanmış “Azərbaycan Respublikası Hökuməti ilə Türkiyə Respublikası Hökuməti arasında tikinti işləri sahəsində əməkdaşlığa dair Protokol” çərçivəsində baş tutub.

Səfərin məqsədi tikintidə təhlükəsizliyə nəzarət, təbii fəlakətlər nəticəsində tikililərə və infrastruktura dəymiş zərərin qiymətləndirilməsi, Elektron Beton İzləmə Sisteminin (EBİS) tətbiqi sahələrində əldə olunmuş razılaşmalarla əlaqədar zəruri işlərin həyata keçirilməsi, təcrübə-məlumat mübadiləsinin davam etdirilməsi və qarşıda duran vəzifələrin müzakirəsindən ibarət olub.

Qardaş ölkəyə səfər çərçivəsində təşkil edilmiş görüşlərdə Türkiyə Respublikasının Ətraf mühit, Şəhərsalma və İqlim Dəyişikliyi Nazirliyinin Tikinti işləri üzrə Baş idarəsi rəhbərinin müavini İsmayil Tuna Cebecioğlu, FHN-in Tikintidə Təhlükəsizliyə Nəzarət Dövlət Agentliyinin rəis müavini Elxan Əsədov, qeyd olunan dövlət qurumlarının mütəxəssisləri və özəl şirkətlərin nümayəndələri iştirak edib.

Silsilə tədbirlərin rəsmi açılış mərasimində çıxış edən İsmayil Tuna Cebecioğlu və Elxan Əsədov Azərbaycan və Türkiyənin tikintidə təhlükəsizliyə nəzarət üzrə aidiyyəti qurumlarının mütəxəssislərinin qarşılıqlı səfərlərinin əhəmiyyətinə toxunaraq, keçən ilin oktyabr ayında Bakı şəhərində keçirilmiş görüşlər zamanı əldə olunmuş razılaşmaların uğurla həyata keçirilməsindən məmnunluq ifadə ediblər. Bildirilib ki, tərəflər arasında aparılmış intensiv müzakirələr və qarşılıqlı təmaslar nəticəsində sözügedən Protokolun müddəalarının həyata keçirilməsi istiqamətində xeyli işlər görülüb, tərəflər arasında sıx qarşılıqlı əlaqə yaranıb və xoş işgüzar münasibətlər formalaşıb.

Görüş zamanı Türkiyənin tikintiyə nəzarət sisteminin tərkib hissəsi olan Elektron Beton İzləmə Sisteminin (EBİS) Azərbaycan Respublikasında tətbiqinin hüquqi və texniki məqamlarını özündə əks etdirəcək metodiki və rəhbəredici sənədin layihəsi üzərində son tamamlama işləri aparılıb.

Eyni zamanda, EBİS sisteminin ilkin olaraq quraşdırılması nəzərdə tutulan FHN TTNDA-nın S.Ə.Dadaşov adına Elmi-Tədqiqat və Layihə-Konstruktor İnşaat Materialları İnstitutunun beton sınağı üzrə laboratoriyalarının EBİS sisteminə inteqrasiyasının mümkünlüyü, texniki imkanları, betondan nümunələrin götürülməsi, sınaq edilməsi və nəticələrinin rəsmiləşdirilməsi prosedurları, eləcə də tikinti materiallarının standartlaşdırılması sahəsində görülmüş işlər barədə təqdimatlar edilib. Bununla əlaqədar praktiki işlərin davam etdirilməsinə dair razılıq əldə olunub.

Səfər çərçivəsində Azərbaycan mütəxəssisləri İstanbul şəhərinin tikinti obyektlərinin birinin yeraltı (əsasən özül) hissəsində aparılan tikinti-quraşdırma işlərinin gedişatını izləyib, tikinti meydançasına daxil olan beton qarışığından nümunələrin götürülməsi, onlara EBİS sistemi üzərindən beton etiketlərin (RFID-çiplərin) yerləşdirilməsi, qəliblənməsi və sınaq laboratoriyasına göndərilmək üçün hazır vəziyyətə gətirilməsi prosedurları ilə tanış olublar. Eyni zamanda, beton nümunələrinin EBİS sistemi vasitəsilə sınaq metodikasına dair müzakirə və işlər özəl sınaq laboratoriyalarının birində davam etdirilib.

Həmçinin, Elektron Beton İzləmə Sisteminin (EBİS) təşkili, onun proqram təminatının hazırlanması və texniki müşayiəti ilə bağlı Türkiyənin innovasiya və texnologiyalar sahəsində ixtisaslaşmış “Aselsan” və “Ankaref” şirkətlərinin nümayəndələri ilə görüşlər keçirilib, bu sistemin Azərbaycanda qurulmasının texniki məqamları müzakirə olunub.

Bundan başqa, təbii fəlakətlər nəticəsində tikililərə və infrastruktura dəymiş zərərin qiymətləndirilməsi istiqamətində həyata keçirilən tədbirlərin davamı olaraq, Azərbaycan mütəxəssislərinin bir qrupu ötən ilin fevral ayında dəhşətli zəlzələnin baş verdiyi Hatay bölgəsinə gələrək, burada təbii fəlakətin fəsadları ilə tanış olublar. Orada hər iki ölkənin mütəxəssislərinin iştirakı ilə bir neçə binaya vizual baxış keçirilib, ziyanın növü və dərəcəsinin xüsusi proqram vasitəsilə təyin edilməsi, binalarla bağlı sonrakı addımların müəyyənləşdirilməsi istiqamətində praktiki işlər icra olunub.

Qarşılıqlı səmimiyyət və işgüzar şəraitdə keçən görüşlərin sonunda “Azərbaycan Respublikası Hökuməti ilə Türkiyə Respublikası Hökuməti arasında tikinti işləri sahəsində əməkdaşlığa dair Protokol”dan irəli gələn tədbirlərin icrasının növbəti mərhələsi barədə razılıq əldə olunub.