FHN Xəbərlər | İctimai-siyasi onlayn qəzet

Hər il iyunun 12-də Ümumdünya Uşaq Əməyinə Qarşı Mübarizə Günü qeyd olunur.

Fhnews.az Beynəlxalq Əmək Təşkilatının (BƏT) saytına istinadla xəbər verir ki, 2024-cü ildə bu gün “Öhdəliklərimizə uyğun hərəkət edək: Uşaq əməyinə son” devizi altında qeyd edilir.

Təşkilatın müraciətində deyilir: “BƏT bütün uşaqların, xüsusən də istismara məruz qalan və risk altında olan azyaşlıların təhlükəsizliyini və sağlamlığını təmin etmək üzrə öhdəliyinə sadiqdir. Əməkdaşlarımız uşaqlar üçün təhlükəsiz və sağlam əmək fəaliyyətinə keçidi dəstəkləyəcək proqramlar hazırlayır və həyata keçirirlər. Onlar bu funksiyanı hökumətlər, işəgötürənlər, vətəndaş cəmiyyəti və digər tərəfdaşlarla əməkdaşlıq şəraitində yerinə yetirirlər”.

BƏT ilk dəfə 2002-ci il iyunun 12-də Cenevrədəki baş qərargahında Ümumdünya Uşaq Əməyinə Qarşı Mübarizə Gününü qeyd edib. Bu çərçivədə keçirilən tədbirlərin məqsədi uşaq əməyinə son qoymaq üçün qlobal çağırışı təşviq etmək və genişləndirməkdir.

Asiya ölkələrində bu problem daha aktualdır. Əməyin istismarına məruz qalmış uşaq və yeniyetmələrin reabilitasiyasına yönəlmiş Uşaq Məşğulluğu üzrə Milli Siyasət Hindistanın mərkəzi hökuməti tərəfindən 1987-ci ildən həyata keçirilir. Bundan əlavə, o, qurbanların ailələrinə kömək etməklə yanaşı, yoxsulluğun əsas səbəblərini aradan qaldırır, ailələrin iqtisadi perspektivlərini artırır.

Təşkilat daha sonra bildirib: “Builki Ümumdünya Uşaq Əməyinə Qarşı Mübarizə Günündə əsas diqqət BƏT-in 2020-ci ildə universal formatda ratifikasiya olunmuş ilk Konvensiyası olan Uşaq Əməyinin Ən Pis Formalarına dair 182 saylı BƏT Konvensiyasının (1999) qəbul edilməsinin 25-ci ildönümünü qeyd etməyə yönəldilib. Biz bu sənədi təsdiq etməyən qalan üzv dövlətləri 138 saylı Konvensiyanı ratifikasiya etməyə çağırsaq da, Ümumdünya Uşaq Əməyinə Qarşı Mübarizə Günü bütün maraqlı tərəflərə BƏT-in uşaq əməyinə dair iki əsas Konvensiyanın həyata keçirilməsini təkmilləşdirməyi xatırlatmaq üçün fürsət də olacaqdır”.

BƏT vurğulayıb ki, uzun müddət ərzində uşaq əməyinin azaldılmasında xeyli irəliləyiş əldə olunsa da, son illərdə qlobal tendensiyaların tərsinə çevrildiyi müşahidə olunur və indi uşaq əməyinin bütün formalarının ləğvi istiqamətində fəaliyyətin sürətləndirilməsi üçün qüvvələrin birləşdirilməsi həmişəkindən daha vacibdir.

Müraciətin sonunda qeyd edilib: “Dayanıqlı İnkişaf Məqsədinin müvafiq bəndinin qəbul edilməsi ilə beynəlxalq ictimaiyyət 2025-ci ilə qədər uşaq əməyinin bütün formalarının ləğv edilməsinə dair öhdəlik götürüb. Bütün dünyada hökumətlər uşaq əməyinə dair BƏT Konvensiyalarını ratifikasiya edib, onların həyata keçirilməsinə sadiqdirlər. 2022-ci ildə Uşaq Əməyinin Ləğv Edilməsi üzrə 5-ci Qlobal Konfransdan sonra nümayəndələr tərəfindən qəbul edilmiş Durban Bəyannaməsi bu istiqamətdə fəaliyyətə çağırışdır. İndi uşaq əməyinin aradan qaldırılmasını reallığa çevirməyin vaxtıdır!”