FHN Xəbərlər | İctimai-siyasi onlayn qəzet

İstanbulda Sultanahmet Meydanındakı Defter-i Hakani Nezareti binasında yerləşən Ayasofya Tarix və Təcrübə Muzeyində 1700 illik Ayasofya tarixi yerli və xarici ziyarətçilərlə görüşür. Qonaqlarını zəngin və çoxşaxəli yeni əsərlər kolleksiyası ilə qarşılayan muzeyin sərgi salonunda bir çoxu ilk dəfə sərgilənən Şərqi Roma və Osmanlı dövrünə aid dəyərli əsərlər yer alır.

Yenilənmiş “Muzey Tarixi Artefaktlar Kolleksiyası”na Qurani-Kərim və XV əsrə aid Quran hissələri, xristian dininə aid nadir şamdanlar və liturgik materiallar daxildir.

Ayasofyanın tikintisində istifadə edilən qədim yunan yazıları olan tarixi kərpic və günbəzdə dörd Seraphim mələkinin üzlərini örtən Fossatti Qardaşları tərəfindən hazırlanmış bürünc medalyonlar da nümayiş etdirilir. Muzey vizual və eşitmə baxımından zəngin tarixi povest, tarixi əsərlər və akademik məlumatlarla ziyarətçilərin diqqətini çəkir.

Muzey Türkiyə Mədəniyyət və Turizm Nazirliyinin yeni təcrübə muzeylərindən birincisidir. Burada xristianlıqla bağlı çoxsayda mühüm kolleksiya var.

Muzeyin direktoru Murat Bozcu muzeyi hər gün təxminən 1000-1250 adamın ziyarət etdiyini deyir.Muzeydə kurasiya işlərinin tamamlandığını və 204 əsərin sərgiləndiyini bildirən Murat Bozcu əlavə edib ki, bunların çoxu əvvəllər muzey anbarlarında saxlanılsa da, ilk dəfə sərgilənir.

Muzeyin daimi sərgi salonunda ilk Ayasofya binasının çox köhnə memarlıq nümunələrinin əhəmiyyətinə diqqət çəkən Murat Bozcu bildirib ki, bunlar həqiqətən də mühüm elmi məlumatlar təşkil edən əsərlərdir. Eyni zamanda, Ayasofya böyük bir meydanda günbəzin yerləşdirilməsi ilə yaradılmış əhəmiyyətli bir memarlıq quruluşuna malikdir. Bu günbəz ilk tikildikdən qısa müddət sonra dağıldı amma sonradan yenidən quruldu.

Təxminən 3 min 200 kvadratmetr qapalı sahəni əhatə edən muzeydə Fatih Sultan Mehmetin İstanbulun fəthindən sonra qurduğu Ayasofya Məscidi Vəqfi ilə bağlı sənədlər sərgilənir. Bu sənədlərdə fondun idarə edilməsi və edilən xərclər haqqında ətraflı məlumat verilir.

Muzeydə Ayasofyanın həm Bizans, həm də Osmanlı dövrləri 23 fərqli dil variantında ən son texnologiyaların köməyi ilə əhatəli vizual və audio ekranda izah edilir.

Eyni zamanda Ayasofya kolleksiyasındakı əsərlərin əksəriyyətinin ilk dəfə sərgiləndiyi Kilsə, Məscid, Muzey və Re-Məscid başlıqları altında 4 bölmə var. Binanın birinci mərtəbəsindəki pəncərələrdən Bizans dövrünə aid bir sarnıç da görünür.