FHN Xəbərlər | İctimai-siyasi onlayn qəzet

2024-cü ilin iyul ayından etibarən Avropa İttifaqı ölkələrində satılan bütün yeni avtomobillərdə məcburi “qara qutu” olacaq. Bu cihazlar qəzadan əvvəl və sonra avtomobildəki bütün məlumatları qeyd edəcək. Avropa İttifaqı tələb edir ki, bütün yeni satılan avtomobillərdə 2024-cü ilin iyul ayından etibarən avtomobilin “qara qutu”su da adlandırılan "Hadisə Data Recorder" (EDR) cihazı olmalıdır.

EDR-lər mümkün qəzadan əvvəl və sonra bir neçə saniyə ərzində avtomobilin sürəti, əyləclənməsi, yoldakı vəziyyəti və avtomobilin təhlükəsizlik sistemlərinin vəziyyəti kimi məlumatları qeyd edəcək. Sistem 2018-ci ildən avtomobillərdə məcburi olan təcili çağırış sistemi ilə inteqrasiya olunmuş şəkildə işləyəcək.

EDR cihazları hava yastığının işə düşməsi, təhlükəsizlik kəmərlərinin qəfil dartılması, zərbə nəticəsində avtomobilin kapotunda fiziki dəyişikliklər və ya sürətin saatda 8 kilometrdən çox dəyişməsi zamanı avtomatik işləməyə başlayacaq.

Qəza halında məlumatlar yalnız səlahiyyətli orqanlar tərəfindən araşdırıla bilər. Bu cihazlar avtomobilin şassi nömrəsinə uyğun qeyd aparacaq, lakin qəzaya uğrayan şəxsin kimliyini məxfi saxlamaq üçün şassi nömrələrinin son 4 rəqəmi gizli qalacaq.

EDR-lər 8 oturacaq yeri olan M1 sinifli minik avtomobilləri üçün məcburi olacaq. Bundan əlavə, N1 sinif kommersiya avtomobilləri, o cümlədən çəkisi 3500 kiloqramdan çox olmayan pikaplar da qara qutunun avtomobil ekvivalenti ilə təchiz ediləcək.

Qeyd edək ki, xalq arasında “qara qutu” kimi tanınan uçuş qeydləri 1960-cı illərin sonlarından uçuşlarda istifadə olunur. Bu cihazlar uçuş zamanı bütün məlumatları qeyd edir. Qəza zamanı asanlıqla tapılması üçün parlaq rənglərdə istehsal olunurlar. ABŞ-da 2012-ci ildə bu cihazların məcburi olması üçün qanun layihəsi təklif edilmişdi, lakin 2019-cu ildə təklif geri götürülmüşdü. Yeni qanun üzərində iş 2022-ci ildən davam edir.

Bu yeni tənzimləmə Avstriya, Belçika, Bolqarıstan, Xorvatiya, Kipr, Çexiya, Danimarka, Estoniya, Finlandiya, Fransa, Almaniya, Yunanıstan, Macarıstan, İrlandiya, İtaliya, Latviya, Litva, Lüksemburq, Malta, Hollandiya, Polşa, Portuqaliya, Rumıniya Slovakiya, Sloveniya, İspaniya və İsveç kimi 27 ölkədə etibarlı olacaq.