22 noyabr 2024, cümə Bakı, 14°C
IMG-LOGO
  • 22 noyabr 2024, cümə 03:18:26 Bakı , 14°C
Ana səhifə Xəbərlər Ətraflı

Xəbər lenti:

Altı ayda icbari tibbi sığorta ilə 15 mindən çox sünnət əməliyyatı icra olunub

12-09-2024
IMG

Cari ilin 6 ayı ərzində icbari tibbi sığorta ilə 15 mindən çox sünnət əməliyyatı icra olunub. Bu əməliyyatlar icbari tibbi sığorta hesabına TƏBİB-in tabeliyindəki dövlət tibb müəssisələrində və Səhiyyə Nazirliyinin K.Y.Fərəcova adına Elmi-Tədqiqat Pediatriya İnstitutunda həkim göstərişi əsasında həyata keçirilir.

İcbari Tibbi Sığorta Agentliyinin mətbuat xidmətindən verilən məlumata görə, prosedur icbari tibbi sığorta hesabına tibbi göstəriş əsasında icra olunur. Sünnət üçün əsas tibbi göstərişlərə fimoz (pülük dərisinin daralması), parafimoz (pülük dərisinin sıxılması) və balanopostit kimi tez-tez rast gəlinən iltihabi xəstəliklər daxildir. Sünnət, həmçinin sidik yollarının infeksiyalarının, o cümlədən insan immunçatışmazlığı virusu (HİV) və cinsiyyət orqanı xərçənginin riskini azaltmaq üçün profilaktik tədbir kimi həyata keçirilə bilər.

Əməliyyat xəstənin yaşına və ümumi sağlamlıq vəziyyətinə görə yerli və ya ümumi anesteziya (sedasiya) altında icra olunur. Prosedur təxminən 30 dəqiqə davam edir və əksər hallarda xəstə həmin gün evə buraxıla bilər. Prosedur zamanı istifadə olunan anesteziya xidməti icbari tibbi sığorta ilə qarşılanır.

Sünnət olunmazdan əvvəl bir sıra tibbi müayinələrdən keçmək lazımdır. Ümumi sağlamlıq vəziyyətinin qiymətləndirilməsi üçün ixtisaslı həkim müayinəsi, əlavə olaraq qanın ümumi və bəzi infeksion xəstəliklərin analizi, koaquloqramma (qanın laxtalanması) yoxlanılır. Onu da bildirək ki, qeyd edilən əməliyyat önü müayinə, laborator analizlər, əməliyyat zamanı istifadə olunan dərman və tibbi sərf icbari tibbi sığorta hesabına qarşılanır.

Paylaş:

Kateqoriyalar

Eyni kateqoriyalı xəbərlər