FHN Xəbərlər | İctimai-siyasi onlayn qəzet

ABŞ-da qatıldığı mitinqdə hücuma məruz qalan və qulağından yaralanan ABŞ-nın keçmiş prezidenti Donald Tramp ölkə tarixində hücuma məruz qalan prezidentlər və prezidentliyə namizədlər siyahısına əlavə edilib. Keçmiş prezident Trampın şənbə günü Pensilvaniyadakı mitinqdə yaralanmasına səbəb olan atışma ABŞ-da silahlı zorakılıqla bağlı narahatlıqları artırıb.

Noyabrın 5-də keçiriləcək prezident seçkilərində namizədlərdən biri olan keçmiş prezident Tramp Pensilvaniyada mitinqdə çıxış edərkən kürsüdə silahla hücuma məruz qalıb. Hücumda Tramp qulağından yaralanarıb, 20 yaşında olduğu deyilən sui-qəsdçi öldürülüb, mitinq iştirakçılarından 1 nəfər ölüb.

İndi isə ABŞ prezidentlərinə qarşı sui-qəsdlərin tarixinə nəzər salaq. Keçmiş ABŞ prezidenti Avraam Linkoln 1865-ci il aprelin 14-də həyat yoldaşı Meri Todd Linkolnla Vaşinqtonda "Bizim Amerikalı qohumumuz" komediya tamaşasını izləyərkən qətlə yetirilib. Hücumdan bir gün sonra vəfat edən Linkoln ABŞ-nın öldürülən ilk prezidenti olub.

ABŞ-da öldürülən ikinci prezident 2 iyul 1881-ci ildə Ceyms Qarfild olub. Qarfild vəzifəsinin 6-cı ayında silahla hücuma məruz qalıb.
Ölkədə üçüncü sui-qəsd 1901-ci il sentyabrın 6-da Amerikanın 25-ci prezidenti Uilyam Makkinlidə olub. O, Nyu Yorkda çıxışından sonra insanlarla əl sıxışarkən güllələnib.

ABŞ-da ölümlə nəticələnən sonuncu sui-qəsd 1963-cü ilin noyabrında president Con Kennediyə qarşı edilib. Kennedi həyat yoldaşı Jaklin Kennedi ilə Dallasda olarkən ona silahla hücum edilib. Kennedi xəstəxanaya aparılıb və qısa müddət sonra dünyasını dəyişib.
ABŞ-da keçmiş prezidentlər ikinci müddətə seçki kampaniyalarında hədəfə çevrildiyi halda, ABŞ-nın keçmiş prezidenti Teodor Ruzvelt 1912-ci il oktyabrın 14-də ikinci dəfə namizəd olduğu seçki kampaniyası zamanı güllə hədəfinə tuş gəlib. Amma sinəsindən güllə yarası aldığı bu hücumdan o sağ çıxıb.

5 sentyabr 1975-ci ildə sui-qəsdlərin hədəfi ABŞ-nın 38-ci prezidenti Cerald Ford olub. Ford elə həmin il bir neçə həftə ərzində iki sui-qəsd cəhdinə məruz qalsa da, onlardan xəsarət almadan xilas olub.

ABŞ-nın 40-cı prezidenti Ronald Reyqan 1981-ci ilin martında paytaxt Vaşinqtonda çıxışından sonra maşınına doğru gedərkən silahlı hücum nəticəsində yaralanıb.

Ölkənin 43-cü prezidenti Corc Buşa 2005-ci ildə Tbilisidə Gürcüstan prezidenti Mixail Saakaşvili ilə birlikdə qatıldığı mitinqdə çıxışı zamanı əl qumbarası atılıb. Əl dəsmalı çox möhkəm bükülmüş olduğundan qumbaranın sancağı ilişib qaldığı üçün bomba partlamayıb.