FHN Xəbərlər | İctimai-siyasi onlayn qəzet

Avropa Xarici Fəaliyyət Xidmətinin iqtisadi və qlobal məsələlər üzrə Baş Katibinin müavini Saymon Mordu, Cənubi Qafqaz və Gürcüstan böhranı üzrə xüsusi nümayəndəsi Maqdalena Qrono, bölmə rəhbəri Dorota Dlouchy, Avropa İttifaqının (Aİ) Azərbaycandakı səfiri Peter Mixalko və digər qonaqlar Ağdamda işğaldan azad edilmiş ərazilərində aparılan minatəmizləmə fəaliyyəti ilə tanış olublar.

Fhnews.az xəbər verir ki, Azərbaycan Respublikasının Minatəmizləmə Agentliyinin (ANAMA) mobil sahə düşərgəsinə gələn qonaqlara Ermənistan tərəfindən ərazilərin minalarla çirkləndirilməsi, bu istiqamətdə aparılan təmizləmə işləri barədə məlumat verilib.

ANAMA İdarə Heyətinin sədri Vüqar Süleymanov bildirib ki, 2020-ci ilin noyabr ayından 2025-ci il aprelin 2-dək humanitar minatəmizləmə fəaliyyətinə cəlb edilmiş qurumlar tərəfindən Qarabağda və Şərqi Zəngəzurda aparılan minatəmizləmə əməliyyatları nəticəsində ümumilikdə 190 min 194,9 hektar ərazi minalardan və müharibənin partlayıcı qalıqlarından təmizlənib. 36 min 479 ədəd piyada əleyhinə mina, 21 min 607 ədəd tank əleyhinə mina və 133 min 514 ədəd partlamamış hərbi sursat (PHS) olmaqla, ümumilikdə 191 min 600 ədəd mina və müharibənin digər partlayıcı qalıqları aşkar edilərək zərərsizləşdirilib.

Ağdam rayonunda aparılan minatəmizləmə əməliyyatları nəticəsində ümumilikdə 35 min 909,5 min hektar ərazi təmizlənib, 31 min 114 ədəd mina və PHS aşkar edilərək zərərsizləşdirilib. Ağdam rayonunda Bərdə-Ağdam dəmiryolu, Bərdə-Ağdam avtomobil yolu, Füzuli-Ağdam avtomobil yolu, Ağdam-Hindarx-Ağcabədi avtomobil yolu, Ağdam sənaye parkı ərazisi, əkin sahələri, meyvə bağları, qeyri-filiz mineral-xammal yatağı əraziləri, su kanalları, qaz kəməri xətləri və digər infrastruktur layihələrinin mina və müharibənin digər partlayıcı qalıqlarından təmizlənməsi fəaliyyəti icra edilib.

Statistikaya əsasən 30 ildə Azərbaycanda mina qurbanlarının sayı 3 min 400 nəfərdən artıqdır. Onların 359 nəfəri uşaq, 38 nəfəri qadınlardır. 10 noyabr 2020-ci ildən 2025-ci il aprelin 2-dək 384 nəfər mina partlayışının qurbanı olub. Onlardan 70 nəfəri həlak olub, 314 nəfəri xəsarət alıb.

Nümayəndə heyəti sonra Sarıcalı kəndi ərazisində minatəmizləmə fəaliyyəti ilə əyani tanış olublar. Bildirilib ki, Beynəlxalq Minatəmizləmə Standartlarına (IMAS) uyğun olaraq ANAMA tərəfindən genişmiqyaslı minatəmizləmə fəaliyyəti həyata keçirilir. Təmizləmə əməliyyatları əllə minaaxtarma, xüsusi təyinatlı mexaniki maşınların, minaaxtaran itlərin dəstəyi ilə icra edilir.

Qonaqlar ərazidən tapılan minaların partlayış yolu ilə zərərsizləşdirilməsini izləyiblər.