24 noyabr 2024, bazar Bakı, 15°C
IMG-LOGO
  • 24 noyabr 2024, bazar 10:23:53 Bakı , 15°C
Ana səhifə Xəbərlər Ətraflı

Xəbər lenti:

Jurnalistlər üçün humanitar minatəmizləmə sahəsində təlim təşkil edilib

08-10-2024
IMG

Azərbaycan Respublikası Minatəmizləmə Agentliyi (ANAMA) və Medianın İnkişafı Agentliyinin birgə təşkilatçılığı ilə media nümayəndələri üçün humanitar minatəmizləmə fəaliyyətinə dair təlim keçirilib.

Ağdam rayonunda keçirilən təlimin başlıca məqsədi media nümayəndələrinin mina təhlükəsi ilə mübarizə fəaliyyətinin işıqlandırılması sahəsində ixtisaslaşdırılması, peşəkarlıq səviyyəsinin artırılmasıdır.

Fhnews.az xəbər verir ki, Ağdam rayonunun Sarıcalı kəndinə səfər edən təlim iştirakçılarına Minatəmizləmə Agentliyinin Əməliyyat rəhbəri Xaliq Zülfüqarov tərəfindən ərazidə icra edilən humanitar minatəmizləmə fəaliyyəti, texniki tədqiqatın nəticəsinə əsasən tətbiq olunan metodologiyalar, sahənin işarələnməsi sistemi barədə ətraflı məlumat verilib.

Təlimin ikinci hissəsi Agentliyin Ağdam mobil bazasında davam etdirilib.

ANAMA-nın İctimaiyyətlə əlaqələr şöbəsinin müdiri Səbinə Sərkərova cəmiyyətin mina təhlükəsi ilə bağlı məlumatlandırılmasında medianın aparıcı rolunu, bu sahədə informasiya prioritetləri, media ilə qarşılıqlı fəaliyyətin genişləndirilməsi və təkmilləşdirilməsinin əhəmiyyətini qeyd edib.

Medianın İnkişafı Agentliyinin Media subyektləri və jurnalistlərlə iş şöbəsinin müdiri Elşən Ağayev isə müvafiq sahədə ictimai məlumatlılığın artırılması və əhali arasında təbliğatın səmərəli formada aparılmasında medianın xüsusi rol oynadığını vurğulayıb.

Agentliyin Göygöl Regional Təlim Mərkəzinin təlimatçısı Rəşad Əliyev tərəfindən humanitar minatəmizləmə təlimlərinin əsasları, minatəmizləmə fəaliyyəti üzrə mövcud kadr potensialının inkişafı və yeni kadrların hazırlanması prosesinin icrası haqda məlumat verilib. Həmçinin mövcud mina təhlükəsi barədə məlumatlılığın artırılması məqsədilə partlayıcı sursatların təhlükəsinə dair maarifləndirmə təlimi təşkil olunub.

Sonda keçirilən müzakirələrdə məlumatların dolğun və obyektiv ötürülməsi, mina təhlükəsi ilə mübarizədə dezinformasiya hallarının qarşısının alınmasında maarifləndirmənin əhəmiyyəti vurğulanıb.

Paylaş:

Kateqoriyalar

Eyni kateqoriyalı xəbərlər