23 noyabr 2024, şənbə Bakı, 13°C
IMG-LOGO
  • 23 noyabr 2024, şənbə 20:05:56 Bakı , 13°C
Ana səhifə Xəbərlər Ətraflı

Xəbər lenti:

Yevlaxı içməli su ilə təmin etmək üçün yeni sutəmizləyici qurğular kompleksi inşa edilib

06-02-2024

Yevlax şəhərini dayanıqlı və keyfiyyətli içməli su ilə təmin etmək üçün Kür çayının sahilində məhsuldarlığı sutkada 20 min kubmetr olan qumsüzgəc texnologiyalı sutəmizləyici qurğular kompleksi inşa edilib.

Fhnews.az xəbər verir ki, Azərbaycan Dövlət Su Ehtiyatları Agentliyindən (ADSEA) verilən məlumata görə, kompleksdə nasos stansiyası, 5 ədəd radial sudurulducu, 16 ədəd qumsüzgəci tikilib. Layihənin ilkin mərhələsində ümumi həcmi 2500 kubmetr olan 2 içməli anbarın və 2,6 km magistral su kəmərinin inşası başa çatdırılıb. Kür çayından nasoslar vasitəsilə götürülən su əvvəlcə xam su anbarına, daha sonra radial durulduculara ötürülür və çökdürülür. Növbəti mərhələdə qum süzgəclərdən keçən su zərərsizləşdirilərək təmiz su anbarına toplanır və yeni magistral kəmərlə şəhərin mövcud içməli su şəbəkəsinə verilir. Hazırda sutəmizləyici qurğu sınaq rejimində istismar olunur.

2023-cü ildə Yevlax şəhərinin yeni içməli su şəbəkəsinin də tikintisinə başlanılıb. Ötən müddətdə 28 km paylayıcı şəbəkə inşa edilib. Yeni şəbəkədən abonentlərə ev birləşməsi verilərək sayğaclar quraşdırılıb. Şəhərin içməli və tullantı su şəbəkələrinin tamamilə yenidən qurulması layihənin növbəti mərhələlərində həyata keçiriləcək.

Yevlax şəhərinin içməli su şəbəkəsinin yenidən qurulması işləri 2024-cü ildə də davam etdiriləcək. Ümumilikdə layihə çərçivəsində Yevlax şəhərində 135 km içməli, 115 km uzunluğunda tullantı su şəbəkəsi yaradılacaq. Şəhərdə yaranacaq tullantı sularının təmizlənib kənarlaşdırılması məqsədilə məhsuldarlığı sutkada 12500 kubmetr olan tullantı sutəmizləyici qurğunun inşası da nəzərdə tutulur. Layihənin icrasından 2035-ci ilə perspektiv inkişaf nəzərə alınmaqla 70 min nəfər sakin faydalanacaq.

Qeyd edək ki, Yevlax şəhərində mövcud olan içməli və tullantı su təchizatı sistemləri 1950-1970-ci illərdə yaradılıb. Mövcud içməli su şəbəkəsi şəhərin 60 faizini, tullantı su şəbəkəsi isə cəmi 20 faizini əhatə etməklə istismara yararsız vəziyyətə düşüb.

Paylaş:

Kateqoriyalar

Eyni kateqoriyalı xəbərlər