FHN Xəbərlər | İctimai-siyasi onlayn qəzet

Fövqəladə Hallar Nazirliyinin regional mərkəzləri tərəfindən “2024-cü il üçün Mülki müdafiə kurslarının dinləyicilərlə komplektləşdirmə planları”na əsasən silsilə mülki müdafiə kursları keçirilib.

Belə ki, Sumqayıt Regional Mərkəzi tərəfindən “Yanğınsöndürmə manqa komandirləri”, Muğan Regional Mərkəzi tərəfindən “Kəşfiyyat manqasının komandirləri” və “Bələdiyyə sədrləri”, Cənub Regional Mərkəzi tərəfindən “Rabitə manqalarının komandirləri” və “Gənclərin çağırışaqədərki hazırlığı üzrə rəhbərlər”, Gəncə Regional Mərkəzi tərəfindən “Xilasetmə manqa komandirləri”, “Ümumtəhsil orta məktəblərin təlim-tərbiyə işləri üzrə direktor müavinləri” və “Kəşfiyyat manqa komandirləri”, Aran Regional Mərkəzi tərəfindən “Xilasetmə manqalarının komandirləri” və “Gənclərin çağırışaqədərki hazırlığı üzrə rəhbərlər”, Şimal Regional Mərkəzi tərəfindən “Xilasetmə manqa komandirləri”, Şimal-qərb Regional Mərkəzi tərəfindən “Gənclərin çağrışa qədərki hazırlığı üzrə rəhbərləri”, Qarabağ Regional Mərkəzi tərəfindən “Gənclərin çağırışaqədərki hazırlığı üzrə hərbi rəhbərlər” kateqoriyaları üzrə mülki müdafiə kursları keçirilib.

Kursların keçirilməsində əsas məqsəd fövqəladə hadisələrdən mühafizə sahəsində maarifləndirmə işinin aparılması, fərdi və kollektiv mühafizə vasitələrindən, ilkin yanğınsöndürmə alət və avadanlıqlarından istifadə qaydalarının öyrədilməsi, eləcə də kurs iştirakçılarının mülki müdafiə qüvvə və vasitələrinin idarə olunması üzrə bacarıqlarının təkmilləşdirilməsi olub.

Kurslarda kollektiv mühafizə vasitələrindən istifadə, təxliyə planlarının düzgün hazırlanması, təbii və texnogen xarakterli fövqəladə hadisələr zamanı davranış, xilasetmə alət və avadanlıqlarından istifadə qaydaları izah edilib, həmçinin mövzulara aid fotoslayd və videoçarxlar nümayiş etdirilib.

Kursların yüksək səviyyədə keçirilməsi üçün FHN-in digər qurumlarının yerli struktur bölmələrinin əməkdaşları da tədris prosesində iştirak ediblər.

Sonda kursları müvəffəqiyyətlə başa vurmuş dinləyicilərə şəhadətnamələr təqdim edilib.