FHN Xəbərlər | İctimai-siyasi onlayn qəzet

Son illərdə aparılan elmi araşdırmalar bağırsaq sağlamlığının insan orqanizmindəki ümumi sağlamlıq vəziyyətinə birbaşa təsir göstərdiyini ortaya çıxarıb. Bu araşdırmaların əsas nəticələrindən biri beyin və bağırsaqlar arasındakı əlaqənin sağlamlıq baxımından əhəmiyyətini göstərməsidir. Mütəxəssislər xüsusilə həddindən artıq stresin bağırsaq funksiyalarını pozduğunu və qıcıqlanmış bağırsaq sindromu (İBS) kimi problemlərin yaranmasına səbəb olduğunu vurğulayırlar.

Fhnews.az Anadolu Agentliyinə istinadla xəbər verir ki, türkiyəli professor dr. Ayhan Hilmi Çekin, bağırsaqlardakı faydalı bakteriyaların immunitetin gücləndirilməsində və bir çox xəstəliklərə qarşı qorunmada əhəmiyyətli rol oynadığını bildirir. O, irritabl bağırsaq sindromunun bu sahədə ən çox rast gəlinən problemlərdən biri olduğunu vurğulayıb. Qeyd edib ki, İBS həyati təhlükə yaratmasa da, təkrarlanan qarın ağrısı, köp, şişkinlik, ishal və ya qəbizlik kimi əlamətlərlə insanın sosial və iş həyatına mənfi təsir göstərə bilər.

Professor bildirib ki, İBS əlamətləri stresin təsiri ilə daha da güclənə bilər: “Bağırsaq hərəkətlərindəki həssaslıq, stresin təsiri ilə sürətlənə və ya ləngiyə bilər. Bunun nəticəsində ishal, qəbizlik və şişkinlik kimi narahatlıqlar yaranır. Lakin İBS-nin xərçəngə çevrilmə riski yoxdur. Buna baxmayaraq, oxşar simptomlar digər xəstəliklərdə də müşahidə olunduğu üçün mütləq mütəxəssis tərəfindən diaqnoz qoyulmalıdır. İBS-nin simptomları fərdlər arasında fərqli formalarda özünü göstərə bilər. Süd məhsulları, çörək, makaron məmulatları, paxlalılar, soğan, sarımsaq və qazlı içkilər bəzi insanlarda simptomları artıra bilər. Bu səbəbdən xəstələrə qida gündəliyi tutmaq və hansı qidaların narahatlıq yaratdığını müəyyənləşdirmək tövsiyə olunur. İBS xəstələrinə qızardılmış və ədviyyatlı qidalardan çəkinmək də tövsiyə edilir. İBS-nin müalicəsi təkcə dərmanlarla məhdudlaşmır. Yüngül simptomları olan xəstələrdə pəhriz və həyat tərzi dəyişiklikləri kifayətdir. Yoqa, meditasiya, nəfəs məşqləri və hobbi ilə məşğul olmaq stresi azaldaraq İBS simptomlarını yüngülləşdirə bilər. Daimi fiziki fəaliyyət də bağırsaq hərəkətlərinin tənzimlənməsində mühüm rol oynayır. Gəzinti, üzgüçülük və yüngül fiziki məşqlərin müsbət təsirləri olsa da, həddindən artıq fiziki yüklənmə bəzi xəstələrdə simptomları artıra bilər. Bu səbəbdən balanslı məşq planına riayət etmək tövsiyə olunur.

Bağırsaq hərəkətlərini tənzimləmək, qida rasionunu nəzarətdə saxlamaq və stressi idarə etmək İBS simptomlarının yüngülləşdirilməsində əsas amillərdir. Bu vəziyyətdə fərdi yanaşma tələb olunur və mütəxəssis nəzarəti ilə həyat tərzi və pəhriz dəyişiklikləri, həmçinin probiotiklərdən istifadə ilə simptomların idarə olunması mümkündür.