FHN Xəbərlər | İctimai-siyasi onlayn qəzet

ADA Universiteti ilə İqtisadiyyat Nazirliyi yanında Dövlət Vergi Xidməti (DVX) arasında nəzəri və təcrübi biliklərin artırılmasına dair birgə əməkdaşlıq haqqında Anlaşma Memorandumu imzalanıb. Sənəd tərəflər arasında intensiv əlaqələr qurmaqla faydalı əməkdaşlığın təşviqini və gücləndirilməsini ehtiva edir.

Fhnews.az xəbər verir ki, bu barədə Dövlət Vergi Xidmətindən bildirilib.

Memorandum ayrı-ayrılıqda və ümumi hədəflərə nail olmaq üçün tərəflərin birgə və koordinasiyalı əməkdaşlığını, ADA Universitetində təhsil alan tələbələrin DVX-nin struktur bölmələrində təcrübə keçməsini, birgə yerli və beynəlxalq elmi konfransların, “dəyirmi masalar”ın, seminarların, təlim kurslarının, simulyasiyaların (müsabiqələrin), forumların, sərgi və görüşlərin keçirilməsini, müştərək layihələrin, müvafiq dərs vəsaitlərinin, elmi məqalələrin və nəşrlərin hazırlanmasını ehtiva edir. Həmçinin tələbələrin könüllülər qismində Xidmətin aparatı və müxtəlif qurumlarında könüllü fəaliyyət münasibətlərini tənzimləyən müqavilə əsasında işə cəlb edilməsi, DVX əməkdaşlarının universitetin tədrisində nəzərdə tutulan mövzulara müəllim və təlimçi qismində cəlbi və digər məsələlər əks olunur.

Anlaşma Memorandumunu Dövlət Vergi Xidmətinin rəisi Orxan Nəzərli və ADA Universitetinin Dövlət, xarici və tələbə işləri üzrə prorektoru, İnkişaf və Diplomatiya İnstitutunun direktoru Fariz İsmayılzadə imzalayıblar.

ADA Universitetinin prorektoru Fariz İsmayılzadə əməkdaşlıq istiqamətlərinin əhəmiyyətindən danışıb, memorandumun hər iki tərəf üçün fayda gətirəcəyini vurğulayıb. Qeyd olunub ki, universitet bu əməkdaşlığı genişləndirməkdə, DVX ilə birgə layihələrin həyata keçirilməsində maraqlıdır və dövlət qurumlarının ehtiyacları istiqamətində müvafiq kadr bazasının yetişdirilməsinə dəstək verir.

Tədbirdə çıxış edən DVX rəisi Orxan Nəzərli imzalanmış sənədin əhəmiyyətini vurğulayaraq, bunun elmi-praktiki əlaqələrin inkişaf etdirilməsinə, ixtisaslı kadr hazırlığının təmin olunmasına, qarşılıqlı maraq doğuran sahələrdə mövcud təcrübəni bölüşməklə bərabər maraqlar əsasında birgə əməkdaşlığın genişlənməsinə töhfə verəcəyinə əminliyini vurğulayıb.

ADA Universitetinin prorektorunun müşaviri, İnkişaf və Diplomatiya İnstitutunun direktor müavini Aygün Hacıyeva universitetin nailiyyətləri ilə bağlı təqdimat edib. Bildirilib ki, 30 müxtəlif proqramı, 7 fakültəsi və 200-dən çox müəllimi olan universitet 150-dək beynəlxalq tərəfdaş təşkilatla əməkdaşlıq edir, burada 5000-ə yaxın tələbə təhsil alır. Universitet nəzdində fəaliyyət göstərən İnkişaf və Diplomatiya İnstitutunun xətti ilə beynəlxalq konfrans və proqramlar təşkil edilir.

Tədbirdə tərəflər qarşılıqlı maraq doğuran məsələləri geniş müzakirə ediblər. Əməkdaşlığın uzun müddət davam etdirilməsi və gələcəkdə insan kapitalının davamlı inkişafı istiqamətində əhatə dairəsinin daha da genişləndirilməsi ilə bağlı fikir mübadiləsi aparılıb.