“Fövqəladə Hallar Nazirliyinin qəzeti” öz fəaliyyətini onlayn formada davam etdirəcək. Bu çox geniş bir auditoriyadır. Həm də daha böyük məsuliyyət, dəqiqlik-dürüstlük, operativlik tələb edir. Sözsüz ki, bu prinsiplər işimizin əsas meyarı olacaqdır. Əks təqdirdə, müasir insanın, oxucunun-izləyicinin informasiya ehtiyacını ödəmək, etimadını doğrultmaq mümkünsüzdür. Toxunacağımız mövzular aktualdır. Bu barədə saytımızın ana səhifəsində, müvafiq bölmədə izləyicilər məlumatlandırılıb. Bununla belə, daha çox üstünlük verəcəyimiz mövzuları xüsusilə vurğulamaq istəyirəm: -Respublikamızın ictimai-siyasi həyatında baş verən yeniliklər, uğurlu iqtisadi inkişaf, əhalinin təhlükəsiz həyat şəraitində yaşaması və işləməsi üçün həyata keçirilən tədbirlər, bu istiqamətdə aparılan məlumatlandırma və maarifləndirmə işləri, fədakarlıq nümunəsi göstərən xilasedici və yanğınsöndürənlərin, eləcə də digər peşə sahiblərinin fəaliyyətini əks etdirən məqalə və təsvirlər, zəngin iş təcrübəsinə malik mütəxəssislərlə müsahibə və söhbətlər və s. saytımızda müntəzəm əksini tapacaqdır. -Dünya xəbərləri, fövqəladə hadisələr, qlobal dəyişikliklər, bu istiqamətdə aparılan elmi tədqiqatlar, alim-mütəxəssis söhbətləri izləyicilərimizin maraq dünyasına uyğun formada işıqlandırılacaqdır. -Ayrı-ayrı idarə, müəssisə və təşkilatların, birlik və şirkətlərin, elmi-təhsil ocaqlarının, idman cəmiyyətlərinin və s. qurumların müraciəti əsasında saytımızda reklam və elanlara müntəzəm olaraq yer ayrılacaqdır. Sözsüz ki, ilk addımlarımızın cəsarətli olması, uğurlarımızın davamlılığı sizlərdən çox asılıdır, əziz izləyicilər. Bizimlə yaxın əlaqənizi, saytımızda fəal iştirakınızı gözləyirik! Yanvar 2023-cü il